أبـــــــدأ إزاي


Untitled-5

حسيت مرة قبل كدة بالإحباط ؟ هل قولت لنفسك مرة إنك جربت كل الطرق الممكنة

عشان توصل لحاجه معينة ، وفشلت في كل مرة .. وده خلاك تشعر باليأس وتقف عن المحاولة ؟

ناس كتير مننا بيجربوا الفشل .. ولما ده يتكرر بيعتقدوا إنه مؤشر انهم غير ناجحين في حياتهم..

وإن أفضل طريقة عشان يتوقفوا عن الشعور بالإحباط هو أن يتوقفوا تماما عن المحاولة .. ويرضوا بالأمر الواقع


إيه الموضوع ده بقى ؟ طيب . عشان نعرف إيه الحكاية تعالوا نعرف إيه هو النجاح بالضبط ؟؟؟

ناخدها واحدة واحدة .. ونحسبها بالعقل ما النجاح ؟

(النجاح هو القدرة على الانتقال من فشل إلى فشل دون أن تفقد حماسك) "ونستون تشرشل"


خدت بالك من المقولة دي ؟ لو قرأت قصص الناجحين في أي مجال هتكتشف حاجة غريبة قوي..

هتلاحظ إن أي شخص ناجح في أي مجال مر بسلسلة من الفشل في بداية مشواره..

لكنه كمل محاولاته لحد ما وصل للنجاح اللي وصل له ..



يعني الفرق بين الناجح والفاشل هو إن الفاشل توقف عن المحاولة وشعر باليأس ..

لكن الناجحين مابيعرفوش الشعور ده


ناخد مثال على الموضوع ده  "توماس أديسون" والمصباح الكهربائي


كتير من الناس بيعتبروا "توماس أديسون" من أكثر العلماء اللي أثروا في حياتنا باختراعاتهم ,

وانا اولهم .. لأن ماحدش فينا يقدر يتخيل الحياة من غير المصباح الكهربائي..


توماس أديسون" يعتبر فعلا من أهم العلماء في تاريخ الإنسانية وله أكثر من براءة اختراع ..


لكن تعرف بقى أنه مر بسلسلة متتاليه من الفشل قبل اختراع المصباح الكهربائي ؟

حاول "توماس أديسون" وأجرى العديد من التجارب لأنه كان يؤمن بفكرته..

فكرة إنه يخترع حاجة بتنور وتكررت تجاربه الفاشلة حتى وصلت إلى 9999 تجربة.. تخيل !! ؟؟


وفي حديث مع وسائل الإعلام سأله أحدهم: "سيد أديسون.. لقد فشلت 9999 مرة،


إنت فاشل عالمي.. لماذا لا تتوقف عن هذه التجارب الفاشلة ؟ عارفين كان رده إيه ؟؟

قال "توماس أديسون": الفاشلون هم أناس لم يعرفوا كم كانوا قريبين من النجاح حين توقفوا!!


يعني لما تجرب كل الطرق الممكنة عشان توصل لهدفك .. قبل ما تشعر باليأس وتتوقف اعرف

إنك قربت جدا من هدفك .. ممكن تكتشف إنك وقفت قبل ما توصل لهدفك بخطوة .. وبتحصل فعلا

عند كتير من الناس .. بس هم مش بياخدوا بالهم|, هاقولك حاجة صغيرة.. فيه حكيم صيني قال:

حينما ينغلق أمامك باب الأمل.. لا تتوقف لتبكي أمامه طويلا.. لأنه في هذه اللحظة انفتح خلفك

ألف باب ينتظرون أن تلتفت لهم

لما تلاقي نفسك يئست اعرف إن نجاحك قرب .. لما تلاقي فشلك اتكرر اعرف إنه مش فشل ..

بل تجارب هتسفيد منها في المرة القادمة عشان توصل لهدفك.. جرب بنفسك


اقعد في مكان هادي وغمض عينيك.. متنامش طبعا فكر في فشل حصل لك

في أي موقف في مواقف حياتك .. فكر بينك وبين نفسك : هل لو حصل لك دلوقتي (في الزمن الحالي)

نفس الموقف.. هتتصرف بنفس الطريقة ولا لا ؟؟


 

أكيد لأ.. مش كده ؟ عارف ليه ؟ عشان التجربة دي علمتك وخلتك أقوى وأكثر خبرة .. تبقى مش فشل ..!

أيوه .. هي دي الحقيقة .. لو عايز تشوف نفسك فاشل هتشوف نفسك فاشل فعلا..

إنما لو عايز تستفيد من كل المواقف اللي حسيت إنك فشلت فيها.. هتلاقي جانب مضيء

ماكنتش واخد بالك منه وعلى طول بص لنص الكوباية المليان مش الفاضى .. وهتستفيد من تجارب

حياتك بدل ما تخليها تضرك..


الخلاصـــــــــــــــــــــة مافيش حاجة اسمها فشل .. فيه حاجة اسمها تجارب اتعلمنا منها،

وهتخلينا نمشي في الطريق الصح .. ومانغلطش نفس الأخطاء بتاعتنا..

ماتخليش أي حاجة تخليك تقف عن المحاولة .. التجارب غير الناجحة دي مجرد خبرات

اتعلمنا منها ازاي نكون أفضل .. خليها حافز للاستمرار مش مبرر للتوقف عن المحاولة...

ممكن تكون قربت جدا وفاضل لك خطوة .. لكن الإحباط خلاك تقف قبل هدفك بسنتيمترات !


حاولت تحقق هدفك وجربت أكتر من مرة لحد ما يئست ؟ دورت على وظيفة ومالاقتش،

فوقفت عن المحاولة ؟ كان لك حلم وبطلت تسعى ليه، لأن حد أقنعك إن مافيش فايدة ؟

كتير من التعليقات اللي هتقول إن مافيش فايدة ومافيش أمل والكلام اللي اتبرمجنا عليه ..

ماتسمعش الكلام ده وخليك ماشي في طريق نجاحك.. كــــن إيجــــابـي ... تعــش إيجــابـي


الناجحين أقل من الفاشلين .. لأن النجاح صعب مش عشان أي حاجة تانية .. اللي يقول لك

إن مافيش فايدة، اعرف إنه مستسلم ومش عايز يبقى من القلة الناجحة في الحياة..

لأن الناجحين مابيعرفوش الكلمة دي .. معظم الناجحين في مصر أو غيرها ..

كانت الظروف ضدهم وفشلوا كتير (فكر في الأمثلة اللي تخطر على بالك) .. لكنهم ماستسلموش ..


أبسطها أوي ...... إنت بقيت كدة إزاي ؟

أكيد إنت وقعت قبل كدة واتعلمت وقومت تاني وجربت من غير ما تقع لحد ما بقيت كدة عشان

إنت لو إنت مستسلم أصلاً كان زمانك ميت أصلا من أول وقعه. ابسطها ... واحنا عيال صغيرة وقعنا كتييير

وحنا بنجرى بنلعب .. مش كدة ؟ طب انت واقف على رجليك دلوقتي إزاي .. ؟؟

لو انت بقى لما وقعت وانت صغير واستسلمت .. كان بقى حالك حاله تانية خالص صح ولا لا ...؟

خلى ضميرك هو اللى يجاوب

هو ده الفرق ..

لو المستسلمين دول أحبطوك وحسسوك إن النجاح مستحيل .. يبقى ارجع تانى لكلامي

دة واقراه تاني .. عشان أنا عارف إنك هتكون نسيته وخليك فاكر ""

احنا بنعيش في الدنيا دي حياة واحدة بس .. خليها تبقى أفضل حياة ممكنة ""

وانت اللي في إيدك تقرر يا تكون نــــــاجـح يا تكون ...... مش حد غيرك


للمزيد إضغط هنا لتصفح الملف التالي